Presidentja e Komisionit Evropian, Ursula von der Leyen, njoftoi një paketë masash tregtare për të lehtësuar shkëmbimet mes Armenisë dhe Bashkimit Evropian, pasi Rusia vendosi embargo ndaj disa produkteve armene përpara zgjedhjeve të qershorit, në përpjekje për të penguar afrimin e kryeministrit Nikol Pashinyan me Evropën.
Masat parashikojnë heqjen e tarifave doganore për rreth 80% të eksporteve armene drejt BE-së.
Sipas Komisionit Evropian, kjo do të kompensojë pothuajse të gjitha eksportet e frutave, perimeve dhe bimëve që më parë shkonin në Rusi, si edhe mbi 91% të eksporteve të pijeve dhe produkteve alkoolike.
Për të ndihmuar Armeninë të zgjerojë tregjet e saj, Komisioni do të dërgojë deri në mesin e korrikut ekspertë që do të punojnë me prodhuesit dhe eksportuesit vendas për të identifikuar mundësi të reja dhe për t’i përshtatur produktet me standardet e BE-së.
“Falë këtyre masave, mund t’i drejtojmë produktet që varen ende nga tregu rus drejt tregut të përbashkët evropian me 450 milionë konsumatorë”, deklaroi von der Leyen.
Ajo njoftoi gjithashtu një fond prej 18 milionë eurosh për të mbështetur diversifikimin tregtar të Armenisë.
