Bayer Munich nuk di të ndalet, por vazhdon arratinë në Bundesligë, pasi ka mposhtur edhe Schalken me rezultatin e ngushtë 2-1. Ndeshja është zhbllokuar që në minutën e 6’, ku sulmuesi polak Lewandowski ishte i pari që arriti tek topi, pas një grushtimi që bën portieri goditjes së fortë që bën Muller nga jashtë zone dhe e dërgon në rrjetë.
Miqtë nuk janë dorëzuar dhe në të 29’-ën minutë kanë gjetur golin e barazimit me anë të Di Santo-s, por festa nuk ka zgjatur shumë pasi vetëm 7 minuta më vonë Muller sjell epërsinë e bavarezëve me një gol mjaft të bukur.
Miqtë kanë rrezikuar në pjesën e dytë me Breel Embolo, por tentativa e tij është ndalur nga një pritje e bukur e Sven Ulrich. Bayern ka kontrolluar pa probleme avantazhin në minutat e fundit dhe ka arritur të marrë tri pikët e radhës. Ndeshja e ardhshme e bavarezëve do të jetë në transfertë kundër Wolfsburg, ndërsa Schalke do të presë Hoffenheim në shtëpi.
Me tre pikët e fituara nga kjo përballje, kampionët në fuqi të Gjermanisë kanë arritur kuotën e 56 pikëve dhe 18 më shumë se Leipzigu i vendit të dytë. Ndërsa Schalke mbetet në vendin e 6 me 34 pikë dy më pak nga zona Champions. Sulmuesi polak është bërë lojtari i dytë në historinë e Bundesliga-s që realizon në 11 ndeshje radhazi të luajtura në shtëpi, duke barazuar rekordin e vendosur nga trajneri aktual i Bayern, Jupp Heynckes, i cili e ka bërë këtë kur luante me Borussia Monchengladbach.
