Avokati i Popullit, Igli Totozani u takua sot me Winfried Bausback, Ministër i Drejtësisë i Landit të Bavarisë, në Republikën Federale të Gjermanisë. Ky i fundit shoqërohej nga Ambasadorja e Gjermanisë në Tiranë, znj. Susanne Schütz.
Totozani e njohu Bausback me procesin e zhvilluar nga institucioni i Avokatit të Popullit, lidhur me Reformën në Drejtësi dhe procedurat e përzgjedhjes së kandidatëve për organet e Vettingut dhe strukturat e tjera që lidhen me këtë reformë, si dhe shprehu vlerësimin maksimal për ndihmën e pakursyer të ofruar nga Gjermania dhe ambasada gjermane në Tiranë:
“Si Avokat i Popullit e konsideroj një fat të madh besimin që na u dha për të nisur procesin e Vetingut. Ndërsa, deklarata e ONM-së për punën profesionale dhe korrekte të ekspertëve të Avokatit të Popullit ishte një certifikim i shkëlqyer, për kontributin dhe angazhimin tonë, në këtë moment historik për vendin”.
Edhe z.Bausback vlerësoi si mbresëlënëse punën e kryer deri tani për Reformën në Drejtësi nga institucioni. Ai u njoh edhe me aktivitetin e kryer në ndihmë të qytetarëve shqiptarë, përgjatë mandatit 5-vjeçar, si dhe për angazhimin ndërkombëtar të institucionit, i cili aktualisht gëzon statusin A në OKB, dhe përfaqësohet në nivele shumë të larta drejtuese në rrjetin e Ombudsmanëve.
