Kreu i Gjykatës Kushtetuese, Bashkim Dedja, ia ka “hedhur” Vetting-ut, e për rrjedhojë Komisioni i Pavarur i Kualifikimit ka vendosur rikonfirmimin e tij në detyrë. Seanca nisi në orën 09:30, dhe kryesuesja e trupës ka deklaruar se me shumicë votash, Dedja rikonfirmohet në detyrë.
Trupa gjykuese përbëhej nga Sanxhaktari, Roland Ilira dhe Xhensila Pine, e dhanë këtë vendim për Deden i cili përfaqësohej nga avokati i tij, Maks Haxhia.
Javën e shkuar, ai u përball me KPK-në dhe sipas hetimit administrativ, Dedja kishte probleme me pasurinë.
Sipas KPK-së, Dedja kishte paqartësi dhe para të pajustifikuara në deklaratat e pasurive. Ato kanë të bëjnë me huat për blerjen e një apartamenti në Tiranë, me sipërfaqe 146 metra katrorë.
Relatorja e komisionit, Xhensila Pine tha një javë më parë se është kryer hetim për deklarimet e pasurisë së Bashkim Dedes: “Apartament banimi 146 m katror, garazh me vlerë 118 mijë euro. Burimi i këtyre aseteve janë kredi bankare 120 mijë euro me afat 20 vjet. Hua pa interes 25 mijë euro. Te ardhurat e tij, 35 mijë euro bashkë me bashkeshorten. Vlera e apartamentit është 180 mijë euro”.
Bashkim Dedja ka bërë dy deklarata noteriale të dyshimta: 15 mijë euro hua nga vëllai, 25 mijë euro për të cilat deklaroi se ia kishte marrë kunatit, e më pas babait të kunatit.
Probleme janë vërejtur edhe me pronësinë e një apartamenti 98 metra katrorë në Tiranë, i cili është deklaruar në vitin 2003 në bashkëpronësi mes Dedjes dhe njërit prej vëllezërve të tij, në masën 50 me 50. Më pas, Dedja, në deklaratën për llogari të Vetting-ut, ka deklaruar se apartamenti është i tiji, 100 %.
