Bashkia e Tiranës ka reaguar lidhur me një njoftim të vendosur në urbanët e transportit publik lidhur me plotësimin e të dhënave personale plus foto në abone duke nisur që nga muaji gusht.
Por, bashkia e ka hedhur poshtë këtë njoftim, duke e konsideruar atë si të pamiratuar dhe abuziv, për shkak se kërkimi i publikimit të të dhënave personale përbën një shkelje ligji.
Gjithashtu, Policia Bashkiake në bashkëpunim edhe me Agjencinë e Mbrojtjes së Konsumatorit, ka ushtruar kontrollet në disa prej linjave të transportit qytetas dhe në rastet kur janë vërejtur njoftime për ndryshim të kërkesave për abonetë mujore, janë marrë masat përkatëse administrative.
“Bashkia e Tiranës i bën thirrje të gjithë qytetarëve që të pajisen normalisht me kartelën e pajtimit mujor për muajin gusht, pa fotografi. Nëse vëreni abuzime apo kërkesa nga operatorë të ndryshëm që bien ndesh me legjislacionin në fuqi, jeni të lutur ta denonconi pranë Bashkisë së Tiranës ose Agjencisë për Mbrojtjen e Konsumatorit”, thuhet ndër të tjera në njoftimin e Bashkisë së Tiranës.
