Bashkia e Tiranës ka prezantuar portalin e ri “Open Data”, ku mund të gjeni disa nga të dhënat statistikore të bashkisë. Portali rrit transparencën dhe u ofron qytetarëve të dhëna të ndryshme për punët, investimet dhe çdo shërbim që kryhet në qytet. Programi u paraqit sot nga kryebashkiaku Erion Veliaj, i cili e vlerësoi atë si një tjetër hap drejt përmirësimit të shërbimit ndaj qytetarëve.
“Më vjen mirë që gjithashtu jemi të parët edhe në çështjet e transparencës. Informacioni nuk është një monopol i yti, për të qëndruar në sënduk, për të bërë raporte apo memo, të cilat ndoshta nuk i lexon askush; përkundrazi, informacioni është mjet i dobishëm për qytetarët”, tha Veliaj.
Duke vlerësuar nevojën për këtë portal informacioni, kryebashkiaku shtoi se portali e ndihmon bashkinë për të përcaktuar, se cila është gjeja më e rëndësishme, që duhet t’i jepet prioritet në punët e qytetit.
