Dështimi i negociatave i ka sjellë palët politike në pikën e tyre fillestare.
Pas takimeve me diplomatët e huaj, David McAllister dhe Knut Fleckenstein, kreu i Partisë Demokratike, Lulzim Basha, tha se javën e ardhshme do të nisë mosbindjen civile, sepse kryeministri Edi Rama nuk i pranoi kushtet e tij.
Nga çadra e protestës së opozitës, Basha vuri në dukje se nuk ka kthim pas, pa krijimin e një qeverie teknike, garantimin të votës dhe numërimin elektronik, zbatimin e plotë të dekriminalizimit dhe të vettingut, sipas marrëveshjes së 21 korrikut të vitit të kaluar.
“Të krijohet qeveria teknike, të luftohet droga, të zbatohet dekriminalizimi dhe të nisë zbatimi i vettingu sipas marrëveshjes së 21 korrikut. Jemi të vendosur që të vazhdojmë betejën tonë, për qeveri teknike, deri në zgjedhje të lira dhe të ndershme. Do të vazhdojmë qëndresën tonë. Javën e ardhshme do të nisim mosbindjen civile për t’i treguar Edi Ramës se koha kur viheshin votat ka marrë fund. Nuk do të ketë zgjedhje pa opozitën. Nuk mund do të ketë pushtet pa opozitë”, tha Basha.
