Kryetari i Partisë Demokratike, Lulzim Basha ka deklaruar nga qyteti i Durrësit se Rama dhe Meta në 4 vite kanë qenë në garë me njëri-tjetrin se kush do të grabiste më shumë.
Sipas Bashës, Rama dhe Meta janë përgjegjësit kryesore për situatën ku ndodhet vendit.
Kryedemokrati bëri thirrje që të dy të ndëshkohen me votë në 25 qershor.
“Kanë qenë në garë Edi Rama dhe Ilir Meta kush e kush vjedh më shumë, kush e kush grabit më shumë në këtë vend. Janë në garë prapë me njëri-tjetrin, por jo për ju por për pushtetin dhe xhepin e tyre. Kësaj do ti japim fund në 25 qershor”,-tha ai.
Më tej, Basha akuzoi Ramën dhe Metën se gjatë 4 viteve kanë kanë qenë në garë se kush hante më shumë ndërsa këto dy javë ata shtiren si opozitar.
“Një të mirë e ka kjo, se ja nxori petët lakrorit, Tani flasin të dy si opozitarë. Po ti dëgjosh duket sikur këta kanë qenë në opozitë jo në qeveri. Shaj njëri e shaj tjetri. Këto dy javët e fushatës u kujtuan të denoncojnë të zezat që ju të gjithë i keni hequr në shpinë. Por ky është mashtrimi i fundit. Shqiptarët nuk kanë për të ngrënë më sapunin për djathë. Një herë mashtroi, premtoi dhe nuk mbajti asnjë premtim, jo se nuk kishte mundësi. Kush e pengoi?! Ilir Metën e kishte nën sqetull. Do rris çmimin e naftës, Amin thoshte Ilir Meta ngriti kartonin. Do rris çmimin e energjisë, ngriti kartonin Ilir Meta. Do e ndaj hartën si të dua unë, ngriti kartonin Ilir Meta, se në Pazar ishin të dy“,-tha Basha.
