Kreu i Partisë Demokratike, Lulzim Basha ka akuzuar qeverinë se po zhvat qytetarët me taksa, ndërsa e cilësoi kalimin e buxhetit të sotëm një katastrofë.
Kryedemokrati tha se deri më tani kanë falimentuar 13.500 biznese, duke detyruar qindra e mijëra shqiptarë që të braktisin vendin. Nga ana tjetër, tha Basha, qeveria po rritur taksat të cilat i përdor për luks e për fasada.
Fjala e Bashës:
Organizata kriminale e rilindjes ka kaluar sot buxhetin më katastrofik, që legjitimon zhvatjen e taksës së 97% të shqiptarëve dhe pasuron një grusht oligarkësh.
Rritje e çmimit të karburanteve, të dritave e të ujit. Kjo rritje galopante që ka çuar në 1.9 mld euro të marra nga xhepat tuaj nuk ka sjellë asnjë rritje ekonomike, përkundrazi.
Numri i bizneseve që kanë mbyllur qepenat është 60% më i lartë. Pyeteni biznesin, a paguan më shumë apo më pak taksën e pronës? 13.500 biznese kanë falimentuar.
Falimentim i biznesit të vogël për shkak të rritjes së taksave. Pronarët e sipërmarrësit e vegjël përbëjnë kontigjentin kryesor të atyre qindra mijëra shqiptarëve që largohen nga Shqipëria. Janë rritur kostot e biznesit, në Tiranë ka shkuar 7-fish taksa vendore. Këto para shkojnë për fasada e për luks qeveritar.
Paratë e shqiptarëve po bëhen rrush e kumbulla. Në projektin e Unazës së Re do hidhet një shumë e barabartë me shumë që shteti parashikon të shpenzojë për ndihmë ekonomike në një vit./ TIRANA TODAY
