Kryedemokrati Lulzim Basha ka sulmuar kryetarin e Bashkisë së Tiranës, Erion Veliaj, dhe kryetarin e Bashkisë së Elbasanit, Qazim Sejdinin, lidhur me taksën e shkollës.
“Tani thonë do kalojmë në një financim të avancuar, t’ju marrin edhe njëherë lekë me tarifa të kripura. Lali fiku ka shpikur taksën e shkollës. A e ka shpik dhe Lala? E ka zënë hashashi, hashashi në pleqni s’ke ça të bësh”, tha Basha.
Kreu i PD-së më pas ka shpjeguar se politika e re në arsim, i jep avantazh institucioneve publike.
“Thelbi i politikës së re në arsim do të jetë që të parët që do të përfitojnë janë sistemi paraarsimor, shkollat dhe universitetet. Institucionet publike do të financohen, ndërsa ato private nuk do të përfitojnë si kanë përfituar. Ne do ta orientojmë universitetin nga tregu”, tha Basha.
Ndër të tjera, ai premtoi mbështetje për universitetet publike si Universiteti i Elbasanit me financime dhe do ti japim më shumë pushtet studentëve në vendimmarrje.
Basha u shpreh se do të financojë 10 mijë stazhe punë për të sapodiplomuarit dhe do të fusë vaktin e drekës në shkollat 9-vjeçare dhe gjimnaze.
