Kreu i Partisë Demokratike, Lulzim Basha ka qenë edhe sot në ditën e 32-të të protestës së banorëve të Unazës së Re në mbështetje të tyre.
Teksa foli para kamerave, Basha tha se duhet të qëndrojmë bashkë të gjithë për të mposhtur të keqen, ndërsa shtoi se çelësi i suksesit është qëndresa, siç po bëjnë banorët e Unazës së re.
“Edi Rama ka kohë që ka shkelur vijën e kuqe. Asnjë zhvillim nuk do të sjellë ky projekt korruptiv. Admirim për kurajon e banorëve. Sot jemi në një betejë kundër vjedhjes ku janë ngritur edhe studentët. Kjo është një revoltë qytetare që po vlon në çdo cep të qytetit dhe në qytetet e tjera. Unë kam një mesazh. Duke vazhduar kështu beteja do fitohet. Mos u dorëzoni se të gjithë së bashku jemi më të fortë dhe do triumfojmë kundër vjedhjes tek Unaza, vjedhjes në universitet dhe duke rikthyer fatin tuaj. Jam i frymëzuar nga qëndresa juaj. Të gjithë së bashku jemi më të fortë, çelësi i suksesit është të qëndrojmë së bashku”, tha ndër të tjera kryedemokrati.
Po ashtu, duke iu përgjigjur pyetjeve të medias, Basha u revoltua teksa kërkoi që gazetarët të mos kërkojnë gjithçka vetëm nga opozita, por të bëjnë detyrën e tyre.
“Bëni detyrën tuaj, kërkoni ku është e vërteta, ku është ligji. U vini mikrofonin prokurorëve. Disa prej stacioneve tuaja e kanë spostuar si lajm. Këtu nuk bëhet fjalë vetëm për 1000 familje, por për të drejtë kushtetuese”, tha Basha duke iu drejtuar gazetarëve.
