Kreu i Partisë Demokratike ka pritur në një takim kreun e delegacionit të vëzhguesve të OSBE-ODHIR për zgjedhjet parlamentare të qershorit 2017, Peter Tejler, mbi përfundimet e raportit të misionit.
Basha ndau me Tejler shqetësimet e ngritura nga opozita lidhur me zgjedhjet e 25 qershorit, ku raportoi për shitblerje të votës, presion mbi zgjedhësit, presion mbi administratën dhe mbi biznesin, përdorimi masiv i shtetit në shërbim të partisë në pushtet, apo cenimin e lirisë dhe sekretit të votës.
Po ashtu, në këtë takim, Basha foli edhe mbi rëndësinë e reformës zgjedhore, teksa tha se përgjimet e Antimafias italiane konfirmojnë se roli i krimit dhe parave të drogës në shitblerjen e votës dhe kërcënimin e votuesve, përbën problemin më të madh të demokracisë dhe zgjedhjeve të lira në vend.
Basha vlerësoi që këto shqetësime janë tashmë rekomandime prioritare nga OSBE/ODIHR-it. Ai u shpreh se Reforma Zgjedhore është prioritet për Partinë Demokratike dhe është kërkuar të nisë puna menjëherë me nisjen e sesionit të ri parlamentar, ndërsa shtoi se vonesat e vullnetit nga ana e qeverisë mund të cenojnë procesin e hartimit të një reforme tërësore.
Në takim, kryedemokrati kërkoi mbështetjen dhe ekspertizën e misionit të OSBE/ODIHR-it për implementimin e rekomandimeve.
“Reforma Zgjedhore duhet të përballet me shumë prej problematikave të shumta të procesit si lista e zgjedhësve, sistemin e adresave, përdorimin e financimeve dhe individëve me rekorde kriminale, përdorimin e pushtetetit, votën e emigrantëve dhe mbi të gjitha shit-blerjen e votës.
Votimi dhe numërimi elektronik është kërkesa dhe kushti parësor i opozitës shqiptare.
Po ashtu, ngritja e një institucioni të pavarur nga qeveria për të ndalur presionet dhe abuzimet mbi administratën është e domosdoshme, ashtu si ndjekja dhe penalizimi fort i çdo rasti të evidentuar për shit-blerje vote,” ka thënë ndër të tjera Basha.
Kryetari Basha mori mbështetjen e Ambasadorit Tejler për një bashkëpunim të plotë me OSBE/ODIHR-in, me eskpertët e tyre më të mirë për të asistuar në hartimin e reformës zgjedhore.
