Kreu i Partisë Demokratike, Lulzim Basha është takuar sot me qytetarë të Mallakastrës. Basha tha se më 18 maj, Republika e Vjetër nënshkroi kapitullimin e saj. Gjithashtu, ai komentoi ngritjen e dy gishtave nga Edi Rama, të cilën e quajti si një përpjekje për ta shitur këtë si një koncesion dashamirës, ndërsa shtoi se pakti nuk ishte dhuratë, por arritje e qëndresës 90-ditore.
Basha foli edhe për shkarkimin e drejtorëve për përfshirje në fushatë, vendim të cilin e mbështeti, teksa tha se do të shkarkohen edhe 300 të tjerë nëse është e nevojshme.
FJALA E BASHËS:
“Faleminderit për besimin e jashtëzakonshëm që keni tek njerëzit e punës. Ndryshimit do t’i prijë Mallakastra. Nuk i harroj ditët e sakrificës tuaj, të qëndresës tuaj, nuk duhet të harroni kurrë që historia ndryshoi pas atij qëndrimi.
Do të ikin edhe 300 drejtorë të tjerë nëse guxojnë të prekin qytetarët. Republika e Vjetër nënshkroi më 18 maj paktin e kapitullimit të saj. Sot përfaqësuesit e Republikës së Vjetër po bëjnë gjithçka për ta shitur këtë si një koncesion dashamirës, duke ngritur gishtat lart. Ju e dini fare mirë që kjo nuk ishte dhuratë, që kjo erdhi për shkak të qëndrimit e vendosmërisë tuaj. Sado e fortë të duket qeveria, nuk ka forcë ta mposhtë bashkimin popullor. Kjo është fitore, është sprapsje e Republikës së Vjetër, ndaj t’ia tregojmë çdo qytetari e t’i themi eja në këtë bashkim.
Mbyllini veshët për cirkun që bën Edi Rama e Ilir Meta, i vetmi synim është të mbajën pushtetin që ta përdorin për veten e vet.”/ Tirana Today
