Kreu i KQZ-së, Denar Biba, ka reaguar për herë të parë, pasi kreu i PD-së e cilësoi si idiot. Biba nuk i është përgjigjur fyerjes së kreut të PD-së, por ka thënë se ai nuk përfaqëson as PS-në dhe as PD-në.
Në një status në Facebook, ai thotë se deklarata e tij që do të jetë avokat i interesave legjitime të opozitës, nuk ka lidhje me PS-në.
STATUSI
Sot p.sh. deklarata ime (e shpallur që hershëm) se, “unë do të jem avokati më i mirë i interesave legjitime të opozitës” është interpretuar nga disa sikur PS u tërhoq nga qëndrimi i saj “i fortë” dhe po i lutet PD që veç të regjistrohet në zgjedhje pa s’ka rëndësi afati.
Kjo pasi sot (data 9 prill) është afati i fundit i regjistrimit të partive për Zgjedhjet e 18 qershorit 2017.
Çfarë mund të them në lidhje me këtë është se, duke qenë se sot është ditë e Djelë, afati shtyhet për nesër.
Përsa i takon qëndrimit tim, s’do fare mend që të kuptosh se është interes absolut i opozitës që të marrë pushtetin, në mënyrë që të vër në jetë programin e saj politik.
Por që kjo të ndodhë, më së pari opozita duhet të regjistrohet e të konkurrojë në zgjedhje.
Në ndërkohë unë do vijoj të jem ai që kam qenë gjithmonë, cilatdo qofshin interesat e ditës së partive politike”.
