Kryetari i PD-së, Lulzim Basha, priti sot në selinë e Partisë Demokratike, senatorin John McCain, kryetar i Komitetit të Senatit Amerikan për Forcat e Armatosura.
Pas vlerësimeve të bëra për kontributin që McCain ka dhënë për Shqipërinë, kryetari i opozitës përcolli shqetësimin e madh për gjendjen kritike të vendit në raport me sigurinë dhe krimin e organizuar, kultivimin dhe trafikun e drogës dhe pranisë së personave me rekorde të rënda kriminale në postet më të larta shtetërore.
Po ashtu, Basha është shprehur se zgjedhjet e ardhshme janë totalisht të pamundura pa çmontuar më parë rrezikun nga paratë e drogës dhe nga kriminelët e interesuar për ruajtjen e gjendjes së tanishme të kapjes së shtetit.
Ky është një detyrim madhor i politikës ndaj qytetarëve shqiptarë, por edhe ndaj aleatëve, sepse si anëtare e NATO-s, Shqipëria duhet të garantojë standardet dhe mbrojë vlerat e demokracive perendimore, ku më themelorja është mbajtja e zgjedhjeve të lira dhe të ndershme.
