Kreu i Partisë Demokratike, Lulzim Basha, theksoi pas takimit me ministrin e Jashtëm gjerman, Sigmar Gabriel se injorimi i trafikut të drogës do të destabilizonte vendin.
Basha shpjegoi se i ka bërë të ditur ministrit të Jashtëm gjerman se Shqipëria është e kapur nga krimi e korrupsioni, dhe se në krye të këtij fenomeni qëndron kryeministri Edi Rama.
Ai nuk komentoi apelin publik të ministrit të Jashtëm gjerman për t’u rikthyer në Parlament, por si duket një mesazh të tillë e ka marrë edhe gjatë takimit me të, kur tha se opozita do të rikthehet në Kuvend vetëm kur të marrë garanci për reformën në drejtësi.
Sipas Bashës, Rama shkeli marrëveshjen e 21 korrikut duke miratuar 6 ligjet e reformës në drejtësi, pa vullnetin e opozitës. Për këtë arsye, Basha i adresoi kryeministrit një propozim të fundit.
“I paraqita faktet dhe dokumentet, që çmontojnë gënjeshtrat e qeverisë mbi drogën dhe pushtetin. Gjithçka që PD ka depozituar është e faktuar në mënyrë të pakundërshtueshme. Europoli thotë që Shqipëria është kthyer në një vend bazë për prodhimin e herorinës dhe trafikimin e saj. Injorimi për tonelatat e drogës do të desbtabilizonte vendin dhe do të rrëzonte institucionet. Me ministrin e Jashtëm gjerman diskutuam për reformën dhe se ne e duam vettingun, por jo siç e do Edi Rama. Vettingu nuk duhet të bëhet nga asnjë kryeministër. Vettingu nuk bëhet nga qeveria, sepse ka në dorë pushtetin. Është në konflikt interesi. PD dhe opozita do të kthehen për të votuar 6 ligjet kur kryeministri Rama të zhbëjë thyerjen e paktit, kur marrëveshja të rikthehet dhe reforma në drejtësi të japë garanci se nuk mbron trafikantët e drogës. Zgjedhje pa luftuar drogën dhe pa realizuar reformën zgjedhore nuk ka për të pasur. Zgjedhje pa qeveri teknike nuk ka. Jemi të hapur dhe të vendosur që të bashkëpunojmë me mazhorancën vetëm përmes një qeverie teknike”, u shpreh Basha.
