Kreu i Partisë Demokratike, Lulzim Basha ka dhënë një deklaratë për mediet, ku ka përgëzuar Prokurorinë e Krimeve të Rënda për operacionin e zhvilluar në Vlorë, ku u kapën 4 ton drogë.
Basha i bëri thirrje Prokurorisë që të nisë hetimin lidhur me dosjen Habilaj dhe të marrë masat e duhura, duke nisur me ndalimin ish-ministrit Tahiri.
Sipas Bashës, pas klanit mafioz qëndron Edi Rama, ndërsa kreu i demokratëve dënoi daljen e Çakos në konferencë ku shkarkoi 12 drejtues të Drejtorisë së Policisë së Elbasanit, gjë që sipas Bashës ndodhi për të larguar vëmendjen nga ngjarjet e tjera.
Fjala e Bashës:
Përgëzim për Prokurorinë e Krimeve të Rënda dhe partnerët e huaj që bënë të mundur kapjen e një sasie droge rekord në Vlore pro klanit Habilaj-Tahiri-Rama
U bëj thirrje organeve të drejtësisë për vënien para përgjegjësisë të autorëve. Pas arrestimit të Habilajt, prokuroria duhet të kërkojë pa vonesë për të vënë prapa hekurave anetërat e klanit mafioz dhe të sekuestrojnë pasurinë e tyre, duke nisur me Saimir Tahirin.
Faktet tronditëse të lidhjes së Tahirit me këtë bande janë të ditura botërisht. I kërkoj prokurorisë të kuptojë domosdoshmërinë e informimit publik.
Dua të dënoj përpjekjen e Haki Çakos për të tërhequr vëmendjen nga operacioni i suksesshëm që u zhvillua me sukses për shkak të izolimit ndaj Policisë së Shtetit. Ka kaluar 1 muaj që kur opozita ka denoncuar me revoltë ngjarjen e tmerrshme të Elbasanit.
Veprimet e Haki Çakos nuk janë thjesht të vonuara, janë pa mend. Në mos të tërhiqej, Çako duhej të ishte shkarkuar.
Ministria e Brendshme drejtohet nga një njeri me konflikt interesi, vëllai i të cilit kërkohet për trafik kokaine. Kjo nuk mund të ndodhë sa kohë në krye të kupolës është Edi Rama.
2.5 milion rrenjë drogë të deklaruara nga Policia e Shtetit përkthehen në 10 mijë ton. 4 ton të kapur sot nuk janë as 2.5% e tyre.
Ka vetëm 1 rrugë për ta nxjerrë vendin nga kriza e legjitimitetit: largimi i Edi Ramës që do shembë lidhjen e krimit me politikën./ Tirana Today
