Kryetari i Partisë Demokratike, Lulzim Basha ka deklaruar sot nga qyteti i Elbasanit, se qeveria Rama hoqi dorë nga meritë-preferenca dhe i la maturantët pa studime.
Basha, u shpreh se me ardhjen në pushtet do të kthejë sistemin e meritë-preferencës dhe do të anulojë ligjin e arsimit të lartë.
Gjithashtu, kryedemokrati u shpreh se me ardhjen në pushtet në 26 qershor do të ulë taksën e arsimit të lartë pasi është duke u përgatitur një ligj i ri.
Sipas Bashës, kjo qeveri po abuzon me tarifat për studentë sepse arsimi i lartë financohet nga Buxheti i Shtetit.
“Arsimi i lartë financohet nga buxheti, pra buxheti janë të ardhurat që mblidhen nga prindërit tuaj, pra e paguani njëherë. Secili paguan TVSH me ushqimet, me ujin, me shërbimet, 20% shkon tek shteti. Të gjithë paguani taksa dhe nga këto taksa mblidhet buxheti. Vetëm me TVSH mblidhen 1.6 miliard euro në vit. Lekët që kanë marrë nga taksat nuk i kanë çuar për arsimin.”, tha Basha.
Kreu i PD-së Lulzim Basha ka pasur një bashkëbisedim me studentë ku ka folur për planin e Republikës së Re për arsimin.
