Tek Barcelona po përgatitet një tjetër goditje e madhe, por për tu arritur kjo gjë duhet të largohet një lojtarë ekstrakomunitar. Katalanasit duket se kanë gjetur një zgjidhje tjetër, pasi nuk duan të largojnë asnjë nga lojtarët që kanë në organikë.
Philipp Coutinho, futbollisti më i shtrenjtë i merkatos së janarit, së fundmi është i interesuar për të bërë të tijën pasaportën portugeze. Pas kësaj raportojnë mediat spanjolle fshihet klubi i Barcelonës i cili i ka kërkuar lojtarit të lirojë vendin e ekstrakomunitarit në ekip. Kjo është lehtë e arritshme nga talenti brazilian, pasi ka 3 vite i martuar me gruan e tij Anna, e cila është portugeze.
Katalanasit janë të interesuar për të firmosur me talentin 21-vjeçar brazilian Arthur Melo, por për momentin është e pamundur pasi vendet për futbollistët ekstrakomunitarë janë të zëna. Për këtë arsye Coutinho është në pritje të pasaportës portugeze. Lajmin e ka konfirmuar edhe ai vetë: “Po, mund ta marrë pasaportën nëpërmjet gruas sime.” Kjo nuk është hera e parë që Barcelona aplikon këto metoda. Më herët Luis Suarez ka lëshuar vendin e ekstrakomunitarit pasi ka marrë pasaportën italiane nëpërmjet gruas së tij Sofia Balbi.
