Banorët e zonës së Astirit kanë dalë sërish në protestë në ditën e 25-të radhazi. Edhe pse ditë feste, ata kanë zgjedhur të protestojnë me flamurin kuqezi, i gjatë 6 metra.
Banorët kanë bllokuar edhe rrugën në shenjë revolte, ndërsa shprehen se sot është ditë feste, por edhe betejë kundër këtij regjimi.
Ata shprehen se banesat i kanë të ndërtuara me gjak, ndërsa sipas tyre policia po i provokon çdo ditë.
“Do e vazhdojmë protestën deri në fund dhe shtëpitë nuk i dorëzojmë. Jemi shqiptarë dhe nuk jemi serbë. Do e ngremë flamurin dhe shtëpitë tona do i mbrojmë se i kemi me gjak. Ne kemi mbështetjen e banorëve sepse kërkojmë shtëpitë tona dhe nuk i nxjerrim fëmijët jashtë.
Të gjithë bashkë jemi për një qëllim. Kjo është ditë festë dhe ditë beteje kundër këtij regjimi. Vetëm ata në kohën e Enver Hoxhës silleshin në këtë mënyrë. Veprojnë natën në mënyrën më të turpshme. Po provokohemi çdo ditë nga policia.”– shprehen qytetarët.
Në mbështetje të banorëve janë edhe deputetë të opozitës.
Një nga banorët theksoi se procesi i legalizimit tek “Unaza e Re” është bërë më miqësi dhe me ndërhyrje. Ai i bëri thirrje qeverisë të marrë masa sa nuk është bërë vonë, raporton BW.
“Legalizimet janë bërë me miqësira me ndërhyrje. Këtu ke një objekt që gjysma është e legalizuar dhe gjysma jo. Projekti të vijojë, por ne duhet të dëmshpërblehemi. Unzën e re e kemi ndërtuar ne, i bëj thirrje të mendoje mirë. Më mirë tani se më pas do të jetë vonë”, deklaroi protestuesi.
