Në shumë vende, rënia e lindshmërisë ka qenë dramatike dhe e shpejtë. Kalimi nga një normë mesatare e fertilitetit, (prej mbi pesë fëmijë për grua), nën normën e zëvendësimit të popullsisë, mori dy shekuj në Francë, por vetëm 34 vjet në Shqipëri, thotë Banka Botërore, në një studim të posaçëm për efektet që ka moshimi i popullsisë në zhvillimin ekonomik afatgjatë.
Norma totale e fertilitetit (TFR) ka rënë në shumë vende të rajonit, po ashtu edhe në Shqipëri, – poshtë 2.1 fëmijë për grua – që është norma e zëvendësimit të nevojshme për të mbajtur popullatat në nivelet aktuale, pa marrë në konsideratë emigracionin. Shqipëria e pati këtë normë 1.5 fëmijë për grua, në vitin 2016. Ulja drastike e normës së lindjeve po “tremb” të gjithë parashikuesit, shkruan Monitor.
