Bylisi kërkon mbijetesën dhe të shtunën do të luajë një ndeshje delikate kundër Partizanit në shtëpi në stadiumin “Adush Muçaj”. Pavarësisht forcës së kundërshtarit, ballshiotët kërkojnë fitoren, pasi është i vetmi rezultat që bën punë.
Një motiv më shumë për lojtarët ballshiotë është fakti se ndeshjet e shkuara të këtij sezoni kundër Partizanit janë në favor të tyre. Në tri përballje që janë zhvilluar deri më tani, një sfidë është mbyllur me fitoren e Partizanit dhe dy të tjera më triumfin e Bylisit. Kjo e fundit dhe Vllaznia janë skuadrat e vetme që kanë arritur ta mposhtin Partizanin dy herë deri më tani.
Gjithashtu, ndeshja e vetme që Partizani e ka humbur me përmbysje është ajo ndaj ballshiotëve, që në një moment po humbnin 2-0, por më pas kthyen gjithçka për të vulosur një triumf 2-3.
Mbetet të shihet sesi do të shkojë kjo përballje e radhës, që i gjen skuadrat në “fije të perit” sa u përket objektivave sezonale. Bylisi lufton për mbijetesën, ndërsa Partizani fillimisht për katërshen e parë e, më pas, pse jo për titullin kampion në “Final 4”.
