Deputeti i Partisë Demokratike, Klevis Balliu ka folur nga zona e Laprakës, ku është shembur një godinë dy-katëshe në kuadër të projektit të Unazës së Re.
Gjatë fjalës së tij, Balliu ka ftuar të gjithë qytetarët që të marrin shembull nga protestuesit në Francë e të rezistojnë ndaj këtij krimi qeveritar.
Deputeti tha se pamja e prishjes së shtëpive është fytyra e fitores së Ramës, ndërsa u bëri thirrje edhe policëve që të bashkohen me qytetarët.
“Qytetarët të marrin shembull nga motrat e vëllezërit evropianë në Francë, që rezistuan dhe në fund fituan. Erdhën si mafioza, i mashtruan, i gënjyen dhe i gjetën të papërgatitur qytetarët. Këta qytetarë nuk kapen më të papërgatitur. Ta ketë të qartë, nëse nuk e ka të qartë, do i trokasim të dera dhe do e zhdukim. Kjo është fytyra e fitores së Edi Ramës, ta shohë çdo qytetar. Në Francë policia iu bashkua qytetarëve. Iu bëj thirrje policëve të heqin kapelen e tu bashkohen protestuesve. Uniforma e tyre vetëm sa u njollos nga kanabisi i qeverisë Rama, të bashkohen me qytetarët e thjeshtë”, përfundoi Balliu./ TIRANA TODAY
