Nuk ka më dyshime, Dajot Upamekano do jetë lojtari i Bajernit të Mynihut nga sezoni i ardhshëm. Marrëveshja mes palëve është arritur dhe pasi të përfundojë sezonin me Lajpcigun, mbrojtësi francez do të bashkohet me kampionët e Gjermanisë.
“Mund të them se u mbyll, jemi të lumtur që Upamekano do luajë për Bajernin. Ne kishim bisedime pozitive për shumë muaj me lojtarin dhe përfaqësuesit e tij. E dinim se kishim konkurrencë të madhe për këtë. Upamekano është një lojtar i ri dhe me cilësi. Ne i paraqitëm atij planin tonë dhe të gjithë u bindën që ta vazhdojë karrierën te Bajerni”, tha Hasan Salihamixhiç, drejtori sportiv i Bajernit për “Sky.de”, duke konfirmuar gjithçka.
Mbrojtësi francez, do i kushtojë kampionëve, 42.5 milionë teksa do të firmosë kontratë 5-vjeçare dhe bëhet kështu transferimi i tretë më i shtrenjtë në historinë e klubit.
Ndërkohë, 22-vjeçari bëhet kështu lojtari i 14-të francez, i cili vesh fanellën e Bajernit në histori.
