Pas golit të shënuar përballë Anglisë, Adnan Januzaj është rikthyer sërish në qendër të vëmendjes së mediave shqiptare dhe europiane. Mesfushori shqiptar është akuzuar gjatë se ka mohuar kombin e tij, Kosovën. Ai priti që të grumbullohej nga trajneri i Belgjikës dhe më në fund iu dha mundësia, të cilën e shfrytëzoi mjaft mirë.
Babai i Adnanit, Abedin Januzaj në një intervistë për “Lajm TV”, ka mohuar të gjitha thashethemet e fundit në lidhje me djalin e tij, ai është shprehur se mediat nuk po tregohen aspak profesionale dhe po shpikin gjëra që nuk ekzistojnë. Djali im asnjëherë nuk e ka mohuar kombin e tij dhe për këtë mund të përgjigjem edhe në gjykatë nëse është e nevojshme.
“Nuk kam pasur dijeni deri tani vonë, ndërsa kam marrë vesh së fundmi se Adnan Januzaj ka mohuar origjinën shqiptare. Ka qenë një devijim i intervistës dhe kjo nuk është aspak profesionale. Më vjen keq për njerëzit dhe mediat që bëjnë këto shpikje.
Mund të them se është degradimi i tyre. Gjithashtu kam parë nëpër media të ndryshme, shpikje dhe fjalë të pavërteta për Adnan Januzajn. Janë duke ofenduar familjen tonë. Dua të sqaroj njerëzit se djali im nuk e ka mohuar kurrë kombin e tij.
Nëse ka të interesuar për dijeni rreth familjes Januzajn, atëherë dera është e hapur që të marrin informata për ne. Nuk janë më patriotë se ne. Nëse del ndokund me fakte ku djali im ka mohuar kombin e tij, atëherë unë mbaj përgjegjësi morale dhe penale”, ka thënë Abedin Januzaj.
