Babai i 31-vjeçarit që vrau ish të dashurën dhe veten, mjaft i lënduar ka thënë se i ka çuar fjalë babait të vajzës për të biseduar. Kjo ngjarje e trishtë tronditi mbarë opinionin publik, e ndërsa familjarët e të dyja palëve i ka rrënuar.
Ndonëse nuk ka qënë një kërkesë e familjarëve për mbrojtje, efektivët e policisë qëndrojnë aty 24 orë me turne, që prej ditës kur ndodhi ngjarja e rëndë.
“Jam në pritje të një përgjigjeje. Përmes një njeriut tim, i kam çuar fjalë babait të vajzës. Tani po pres që të takohemi dhe të bisedojmë”, shprehet Taip Mata.
Ai thotë që ende nuk është momenti për të folur rreth ngjarjes së rëndë që ka ndodhur. “Çdo fjalë e thënë pa menduar, në mërzitje e sipër dhe në trishtimin që na ka rënë për pjesë të përjetojmë, do na rëndonte më shumë ne dhe ata”, shprehet ai për “Panorama”.
Ndërkohë, babai i Xhaferit pranon se ngjarja mund të parandalohej. Sipas tij, nëse Policia apo Prokuroria do e kishin vënë në dijeni familjen e Xhuljeta Çunit, gjërat sot mund të ishin ndryshe.
Xhafer Mata, 31-vjeç, një javë më parë vrau ish-të dashurën Xhuliana Çuni, e cila ishte maturante në gjimnazin “Qemal Stafa” në Tiranë dhe më pas veten.
