Sot mbushen plot 20 vjet nga ndarja nga jeta e ‘heroit të demokracisë’, Azem Hajdari. Në një simpozium, ku i pranishëm ishin personalitete të Partisë Demokratike si Lulzim Basha, Sali Berisha, Besnik Mustafaj, etj., Rudina Hajdari mbajti fjalën hapëse, e cila ngriti lart dhe vlerësoi kontributin e dhënë nga i ati, si lideri i ‘Lëvizjes së Dhjetorit’, që përmbysi diktaturën komuniste.
Homazhet për 20-vjetorin e vrasjes së Azem Hajdarit kanë bërë bashkë disa nga figurat e rëndësishme të Partisë Demokratike. Ndërkaq, mazhoranca është përfaqësuar në këtë aktivitet nga Ministri për Diasporën, Pandeli Majko.
Gjatë ceremonisë u vu re mungesa e ish-kryetares së Parlamentit, Jozefina Topalli. Në këtë aktivitet nuk kanë marrë pjesë as ish-nënkryetari i PD-së, Astrit Patozi dhe ish-ministri i Financave, Ridvan Bode, dhe ish-deputeti Igli Cara. Këta të fundit morën pjesë vetëm në homazhet që u zhvilluan në Memorialin ku u vra Azem Hajdari.
