Henrik Ligori, avokati i mjekut kardiolog të QSUT-së, Edvin Prifti ka ngritur dyshimet pse operacioni i SPAK u zhvillua në këtë moment, pak muaj para zgjedhjeve.
Ligori u shpreh në gjykatë se krimi për të cilin akuzohet mjeku Prifti është hipotetik dhe nuk ka prova.
Ai po ashtu sqaroi se paratë e gjetura në shtëpi, një pjesë e tyre, 220 mijë euro janë fituar nga klienti i tij në çmime ndërkombëtare.
“Pse nuk u ndërhy në korrik të 2020 kur u bë operacioni por u bë tani. Pse po ndërhyhet pikërisht në vigjilje të fushatës zgjedhore? 220 mijë euro janë para të fituara nga çmimet ndërkombëtare. Masa është dhënë për një krim hipotetik për të cilin s’ka prova.”-u shpreh Ligori.
Më herët po gjatë ditës së sotme, Prokuroria ka kërkuar masën e sigurisë ”Arrest me burg” për mjekun Prifti. Mësohet se atij i është shtuar dhe akuza për pastrim parash.
Hetimet ndaj tij nisën bazuar në përgjimet e sekretares së Gjykatës së Krujës, të cilat kishin nisur për lirimin e të dënuarve por që kanë zbuluar për Prokurorinë e Posaçme edhe korrupsionin në shëndetësi.
Nga përgjimet, ka rezultuar se sekretarja e Gjykatës, Manuela Mallkuçi, i ka dhënë para kirurgut Edvin Prifti, me qëllim që ky i fundit të bënte operacion nënën e saj.
Kontrolli i kryer pasditen e të enjtes, 11 shkurt në banesën e tij zbuluan 250 mijë euro dhe 16 milionë lekë në zyrën dhe banesën e kardiologut të njohur.
