Një konflikt mes dy grupeve të rinjsh në qytetin e Laçit, ka shkuar deri në përdorimin e armëve, ku për pasojë kanë mbetur të vdekur shtetasit Mikel Jushi, 35 vjeç, dhe Jani Jushi, 30 vjeç, kushërinj me njëri-tjetrin. Për shkak të plagëve të marra, ata kanë ndërruar jetë në Spitalin e Traumës në Tiranë.
Autorët e vrasjes së dy të rinjve mbrëmë në Laç janë Vincens Pali (Bushi) dhe Markel Gjonbushi, 25 vjeç. Ky i fundit është person me precedent penal, dhe i njohur për drejtësinë shqiptare. Ai ishte shpallur në kërkim, ndonëse lëvizte i lirë dhe madje të përfshihej në një ngjarje kriminale.
Në vitin 2012 ai së bashku me shokun e tij, Daniel Shyti vodhën disa vajza që po shkonin në Kishën e Laçit, dhe njërën prej tyre e qëlluan me armë. Pas ngjarjes ata u arrestuan. Gjykata e dënoi Daniel Shytin me 6 vite burgim në vitin 2013. Ndërkohë që Markel Gjonbushi nisi gjykimin e tij në gjykatë duke mos kërkuar as gjykim të shkurtuar, por më pas arriti të arratisej duke u dënuar në mungesë me 9 vite burg.
Prej vitit 2013, ai ndodhej në kërkim nga policia, nën akuzën e ‘vjedhjes me armë’. Në 21 nëntor të 2017, policia organizoi një operacion për arrestimin e tij, por Markel Gjonbushi qëlloi me armë në drejtim të efektivëve, dhe arriti që të humbte gjurmët, duke u arratisur, ndërkohë që mbrëmë së bashku me Vincens Palin (Bushin) vranë dy kushërinjtë.
Atentati në mes të Laçit/Identifikohen dy vrasësit e kushërinjve
