Peruja është goditur nga një tragjedi, pasi një autobus me futbollistë të moshës U-15 ka rënë në një humnerë. Të paktën shtatë persona kanë humbur jetën nga ky aksident, nga të cilët shumica fëmijë. Sipas Ministrisë së Brendshme peruane, gjashtë futbollistë të moshës 11-14 vjeç të ekipit U-15 të provincës Rodrigez de Mendoza humbën jetën.
Autobusi ishte duke e transportuar skuadrën në kryeqytetin e departamentit të Amazonas, Çaçapojas, ku do të zhvillohej një turne rajonal. Edhe shoferi i autobusit ka humbur jetën në aksident. Burime të policisë bënë me dije se nëntë persona të tjerë janë të plagosur rëndë: 7 futbollistë, një burrë dhe një grua, të cilët po shoqëronin skuadrën.
Për momentin nuk dihen ende shkaqet përse autobusi me 35 pasagjerë u rrëzua në një humnerë rreth 90 metra të thellë në zonën e Rondonit, 1.200 km në verilindje të kryeqytetit Lima. Turneu në të cilin skuadrat U-15 të Amazonas do të merrnin pjesë u anulua në shenjë zie.
