Nga e mërkura, karantina nuk do të jetë më për vizitorët që do të vizitojnë Austrinë. Lejimi nuk do jetë kaq i thjeshtë, por vetëm duke u pajisur me një certifikatë shëndetësore, që tregon se nuk janë të infektuar me COVID-19.
Ky lajm mjaft i mirë është përcjellë nga ana e Ministrit të Shëndetësisë, Wolfgang Mueckstein. Këto masa lehtësuese vijnë në një kohë kur infektimet kanë pësuar një ulje të ndjeshme. “Numrat e infeksioneve po bien në shumë vende, prandaj ne mund të shpallim këto lehtësime të hyrjes paralelisht me hapat tanë për të hapur ekonominë”, tha ministri Mueckstein.
Për të shmangur karantinën, personat që hyjnë në Austri do të duhet të sigurojnë vërtetim të vaksinimit, ose një rezultat negativ të testit për COVID-19, ose të konfirmojnë se janë shëruar nga koronavirusi. Gjithashtu, ata duhet të regjistrohen në mënyrë elektronike para mbërritjes. Lehtësimi i masave vlen për mbërritjet nga Belgjika, Bullgaria, Republika Çeke, Danimarka, Franca, Gjermania, Greqia, Hungaria, Italia, Portugalia, Spanja dhe Zvicra.
