Dhimbja që ka kapluar familjen e 17-vjeçares është e madhe, por edhe më e rëndë bëhet fakti kur në media janë aluduar për prindërit e saj si të ndarë, apo se e kanë lënë në mjerim total.
Në shumë media përflitej se i ati i kishte vdekur, ose nëna kishte ikur në Itali, dhe e ndjera duhet të mbante familjen. Të gjitha janë veçse trillime. Mjaft i irrituar nga çfarë ndodhi në një kohë fare të shkurtër, një reagim është përcjellë nga Arqipeshkvi i Mirditës, Don Gjergj Meta.
“Kur gënjehet apo sajohet për një klik më shumë. Pse? Tragjedia e vajzës së vrarë mbrëmë na ka prekur të gjithëve. Vetëm 17-vjeç, dhe me shumë dëshirë për të jetuar si të gjitha bashkëmoshatarët e saj.
Informacioni është një e drejtë, por… mos ia vdisni nënën se e ka gjallë, e as të atin mos e bëni me faj duke gënjyer se është larguar”, ka shkruar ndër të tjera Arqipeshkvi i Mirditës, zonë prej së cilës vinte dhe vajza.
Dom Gjergj Meta shprehet se prindërit e Briselda Gjikolës janë bashkë. “Janë një familje normale e Shqipërisë dhe Mirditës tonë, që janë larguar nga Kurbneshi për një jetë më të mirë në Tiranë, ashtu si mijëra familje që nuk shohin një të ardhme aty.
Iliri dhe Drita janë prindërit e vajzës së vrarë, dhe janë bashkë. Verifikoni përpara se të shkruani të dashur gazetarë. Mos vrisni dy herë. Respektoni familjen dhe dhimbjen e tyre. Mos ushqeni thashethemin e kureshtarëve epshorë, vetëm për pak klikime duke thënë gjëra të pavërteta”, përfundon ai mesazhin e tij.
