Lulzim Visha, 48-vjeç mbeti i vrarë mëngjesin e sotëm, 24 janar, në zonën e Zall Mnerit në Kamëz.
Trupi i pajetë i 48-vjeçarit u konstatua nga një banor i zonës, i cili lajmëroi menjëherë policinë.
Media ka siguruar foton e automjetit në të cilin ndodhej Visha, pak minuta pas ekzekutimit.
Xhami i automjetit është bërë shoshë nga plumbat.
Si ndodhi ngjarja
Ishin banorët e lagjes të cilët panë trupin e viktimës të mbuluar me gjak dhe lajmëruan menjëherë policinë. Sipas tyre në zonë nuk janë dëgjuar të shtëna, çka për hetuesit ngre dyshime se autorët kanë përdorur armë me silenciator.
48-vjeçari i cili punonte si postier, është ndjekur nga autorët, pasi këta të fundit kishin dijeni për lëvizjet e tij. Rreth 200 metra pasi ka dalë nga banesa, autorët i kanë zënë pritë dhe e kanë qëlluar disa herë nga pjesa e përparme e mjetit ku afro 13 plumba i kanë marrë jetën Lulzim Vishës.
Predhat e kanë prekur në pjesën e sipërme të trupit si në kraharor dhe në kokë duke rezultuar fatale.
Më pas autorët janë larguar me shpejtësi me një mjet tip Porche. Kanë qenë kamerat e sigurisë të banesave private që kanë fiksuar lëvizjet e makinës.
Disa orë më pas, në zonën e Zall Herrit është gjetur një mjet i djegur, për të cilin grupi hetimor dyshon se është i autorëve.
Nga këqyrja e automjetit, në brendësi të tij, është gjetur një armë e gjatë zjarri, e dyshuar si arma e përdorur nga autorët.
Gjatë verifikimeve për targat e automjetit ka rezultuar se janë të vjedhura që në muajin Prill 2023, në Kamëz.
Blutë menjëherë pas krimit nisën kotrolle në disa banesa në lagjen e viktimës ku kryesisht janë kontrolluar shtëpitë e disa personave me precedentë penal.
Një nga pistat që po hetohet është ajo e hakmarrjes. Në vitin 1997 Besnik Visha, vëllai i Lulzim Vishës vrau për motive të dobëta Refik Domin. Për këtë krim ai u dënua me 12 vite burg, ndërkohë që u kap nga RENEA në vitin 2009. Edhe Lulzim Visha rezulton me precedente penal për armëmbajtje pa leje.
Një tjetër pistë që është ngritur nga grupi hetimor është ajo e një konflikti që dy vëllezërit kanë pasur kohët e fundit me disa persona të tjerë në zonën e Zall Mnerit.
