Milani ka barazuar 1-1 me Atalantën në një ndeshje ku do të vendoseshe fati i sezonit, pasi në rast humbje kuqezinjtë rrezikonin pjesëmarrjen në Europa League. Kur mbetet për tu luajtur edhe një ndëshje kuqezinjtë kanë siguruar matematikisht pjesëmarrjen.
Do të jetë vendi i 6 apo i 7 skuadra e Gattusos këtë sezon. Barazimi ishte rezultati ideal në këtë sfidë pasi të dy ekipet do të qëndronin në garë për Europën dhe ashtu ndodhi. Në një ndeshje të luftuar nën shiun e rrëmbyeshëm të Bergamo, kuqezinjtë kaluan në avantazh në saj të golit të shënuar nga Franck Kessie, pas një ore lojë. Mesfushori, që vjet luante me Atalanta, goditi saktësisht nga jashtë zone.
Ndeshja u tensionua dhe arbitri u detyrua të tregojë dy herë kartonin e kuq, në të 64’-ën për Toloin e Atalantës dhe më pas për Montolivon për një ndërhyrje të rrezikshme ndaj Gomez. Mbrojtja e Milan, me në krye kapitenin Leonardo Bonucci, që luante ndeshjen e tij të 300-të në Serie A, u dorëzuan në minutën e parë shtesë, kur Atalanta barazoi me golin e Masiello.
