Kryetari i Komunës së Prishtinës dhe njëherësh zyrtari i lartë i Lëvizjes Vetëvendosja, Shpend Ahmeti ka hedhur poshtë zërat se është arrestuar mbrëmë në Milano nga policia italiane.
Mediat e Kosovës publikuan menjëherë lajmin për ndalimin e Ahmetit, pa verifikuar burimin dhe shpjegimin e rrethanave. Por ka qenë vetë Ahmeti që ka sqaruar gjithë ngjarjen.
Përmes një statusi në Facebook, ai shkruan se nuk është arrestuar dhe s’ka pasur arsye përse të ndodhte. Sipas tij, ka qenë vetëm një verifikim që është kryer në aeroport lidhur me sulmin terrorist që ndodhi në Spanjë për shkak të emrit të tij.
Ahmeti ndodhej në Milano për të ndjekur në “San Siro” ndeshjen midis Milanit dhe Shkëndijës së Tetovës, ndeshje e vlefshme për turin play-off të Ligës së Kampioneve, e cila përfundoi 6 me 0 për italianët.
Por, përveç Shkëndijës së Tetovës, gjërat nuk kanë shkuar mirë as për Shpend Ahmetin, i cili u ndalua në aeroportin e Milanos, për verifikim për shkak të sulmit të ndodhur në Barcelonë pasditen e djeshme.
