Ky është momenti kur forcat RENEA dhe policia e Durrësit arrestojnë të shumëkërkuarin Xhevdet Plaku dhe gjashtë persona të tjerë. Prangosja e tyre u bë teksa drekonin në një restorant në Gjirin e Lalzit.
Tre nga të arrestuarit, mes të cilëve Xhevdet Plaku, Flobenc Meçia, që shihni në këto foto, dhe Voltan Xhani, ishin kërkim nga policia dhe cilësohen si persona me rrezikshmëri të lartë.
“Xhevdet Plaku është arratisur nga burgu i Ankonës, në muajin janar 2025 dhe për këtë arsye autoritetet gjyqësore italiane kanë lëshuar urdhër arresti për të. Flobens Meçia, i shpallur në kërkim nga SPAK për veprat penale “Organizata kriminale”, “Kryerja e veprave penale nga grupi i strukturuar kriminal” dhe “Sigurimi i kushteve dhe i mjeteve për të kryer vrasje”. Voltan Xhani, për veprat penale “Trafikimi i mjeteve motorike” kryer në bashkëpunim dhe “Sigurimi i kushteve dhe i mjeteve për të kryer vrasje”, në funksion të hetimeve për zbardhjen dhe dokumentimin ligjor të vrasjes me armë zjarri të shtetasit E. Rr., ndodhur në Shkodër”,deklaroi kreu i policisë së Durrësit, Vilson Bala.
Të tre këta persona ishin të armatosur në momentin e arrestimit nga policia. Xhevdet Plaku është një emër shumë i lakuar në muajt e fundit. 45-vjeçari është i njohur edhe për përdorimin e mbi 25 identiteteve.
I njohur dhe me nofkën “Akili”, Xhevdet Plaku u përmend dhe në komunikimet e SKY, zbërthyer nga SPAK, ku rezultoi se në shtator të 2019 ndaj tij ishte planifikuar një atentat, por që nuk u realizua.
Aktualisht ai kërkohet nga Italia vend ku është dënuar për trafik narkotikësh.
Tv Klan
