Kryetari i Partisë Demokratike, Sali Berisha, ka vijuar takimet me diasporën shqiptare, ku sot është pritur nga emigrantët në Parma, Itali.
Gjatë fjalës së tij, Berisha bëri një krahasim historik mes rënies së kryeqyteteve dhe fundin e diktaturave, duke paralajmëruar fundin politik të kryeministrit Edi Rama pas arrestimit të kryebashkiakut Erion Veliaj.
“Në historinë e regjimeve, kur bie kryeqyteti, diktatura është e pashpresë. Ra Tripoli, iku Gadafi. Ra Damasku, iku Assadi. Ra Tirana, do thyejë qafën Edi Rama!” – u shpreh Berisha, duke i mëshuar idesë se opozita është pranë një fitoreje vendimtare.
Ai gjithashtu akuzoi qeverinë dhe kryebashkiakun Erion Veliaj për shpërdorim të fondeve publike, duke e lidhur këtë me stilin e jetesës së familjes Veliaj. “Rama përpiqet të bindë shqiptarët që Velica të ketë garderobën identike me gruan e Assadit, e tëra e bazuar në vjedhjen e taksave të qytetarëve të Tiranës nga Erion Veliaj,” tha ai.
