Policia e Krujës ka arrestuar Rexhep Rrajën, djalin e deputetit të Partisë Socialiste, Rrahman Rraja. Ndaj tij, Gjykata vendosi sot masën e sigurisë “arrest me burg”, ndërsa uniformat blu ekzekutuan vendimin e dhënë nga togat e zeza.
Djali i deputetit socialist, Rexhep Rraja, është i akuzuar për dhunimin e Xhisiela Malokut. Ngjarja bëri bujë pas denoncimit në media të oficerit të policisë, Emiljano Nuhu.
Një ditë më parë, Rexhep Rraja është marrë në pyetje nga oficerët e policisë së Krujës, ndërsa sot ai është arrestuar me akuzën e “dhunës” dhe “përndjekjes”.
Prangosja e tij vjen pak ditë pas publikimit të rastit të Xhisiela Malokut, e dhunuara nga djali i deputetit Rraja, në një ngjarje që shkaktoi përplasje me politikës shqiptare, me opozitën që akuzon se u fsheh nga policia.
Ndalimi i tij vjen gjithashtu pasi ekspertiza mjeko-ligjore i konfirmoi Prokurorisë se ndaj Xhisiela Malokut është ushtruar dhunë, me një dëmtim që i ka humbur aftësinë e përkohshme për punë deri në 9 ditë.
Në ekspertizën e së resë thuhej se ajo ka qenë objekt dhune.
“Dërrmishtja në shpatullën e djathtë dhe ekimozat në pulpën dhe kërcirin e majtë, janë shkaktuar me mjet mbretës. Dërrmishjet e vërejtura në kofshën e djathtë, janë shkaktuar nga veprimi i faktorëve termikë, siç mund të jetë edhe cigarja.
Dëmtimet e konstatuara në trupin e 25-vjecares, sipas ekspertëve të mjekësisë ligjore, hyjnë në kategorinë e dëmtimeve të cilat sjellin si pasojë humbjen e aftësisë së përkohshme për punën në masën prej 9 ditësh”.
