Nëse presidenti Donald Trump do të jepte urdhër për përdorimin e armëve bërthamore, oficeri amerikan i ngarkuar për këtë detyrë deklaroi se do të refuzonte urdhrin nëse ai ishte i jashtëligjshëm. Gjenerali i forcave ajrore, John Hyten tha se “ushtarakët janë të detyruar të ndjekin vetëm urdhra ligjor”.
Megjithatë ai nuk e përcaktoi se çfarë është një urdhër i jashtëligjshëm për lëshim, por tha se ka pasur dekada trajnim për ligjet mbi konfliktet e armatosura.
Hyten i mbajti këto deklarata dje, gjatë Forumit Ndërkombëtar të Sigurisë “Halifax” në Nova Scotia (Kanada).
Shumë pyetje janë ngritur mbi procedurat e përdorimit të armëve bërthamore pas deklaratave të Trump për të lëshuar “zjarr dhe zemërim” dhe për të “shkatërruar krejtësisht” Korenë e Veriut nëse do të jetë e nevojshme dhe shumë persona i interpretojnë këto si referencë ndaj një sulmi bërthamor.
Megjithatë, Trump kohet e fundit i ka ulur tonet duke u shprehur, gjatë një fjalimi në Seul, se nuk kërkon një përballje me Korenë e Verit.
