Arlind Ajeti sezonin e fundit ishte pjesë e Crorone në Serie A dhe më pas u kthye tek Torino, të cilët vendosën të shkëpusnin marrëdhënien me shqiptarin. Për mbrojtësin kuqezi kishte shumë skuadra të interesuara nga Serie B, por Ajeti vendosi të priste dhe të mos bënte zgjedhje të nxituar.
Qendërmbrojtësi i Shqipërisë më në fund tashmë ka arritur të bëhet me ekip të ri, pasi ka firmosur sot për Grasshopper, duke u kthyer në futbollin zviceran. Mbrojtësi 24-vjeçar ka firmos sot me klubin e ri një kontratë 1 vjeçare me opsion për të rinovuar me dy vite të tjera.
Ajeti është rritur te Basel, ku u bë lojtar i rëndësishëm dhe tërhoqi vëmendjen e kombëtares shqiptare, por në Itali nuk i ka ecur, sepse vetëm te Frosinone shkëlqeu, në pak muaj në vitin 2016. Grasshopper kishte një problem madhor ditët e fundit, sepse iu dëmtua rëndë mbrojtësi brazilian Nathan, ndaj u bë e detyrueshme gjetja e një zëvendësuesi dhe Ajeti ishte i lirë në treg dhe mund të firmoste në çdo moment.
Der Grasshopper Club Zürich gibt die Verpflichtung von Arlind Ajeti bekannt. Er unterschreibt einen Einjahresvertrag mit einer Option für zwei weitere Jahre. ✍ News: https://t.co/HzOJFwSjCo #gc #zürich #traditionsclub #arlind #ajeti
— Grasshopper Club Zürich (@gc_zuerich) September 13, 2018
Në këtë mënyrë, pas Mavrajt sistemohet edhe Ajeti dhe shpresa është që të luajë rregullisht në Zvicër, për t’u kthyer në kombëtare. Në ekipin e ri Ajeti nuk do ndihet shumë i vetmuar, sepse gjen edhe Bujar Likën, mbrojtësin e kombëtares sonë, por janë edhe Gjelbrim Taipi, Shani Tarashaj e Nedim Bajrami, duke krijuar një komunitet shqipfolës.
Drejtori i Grasshoper, Matias Ualter, pas firmosjes së kontratës deklaroi: “Jemi të lumtur që morëm menjëherë një përgjigje pozitive nga Arlindi për të na u bashkuar, pas dëmtimit të papritur të mbrojtësit Natan. Arlindi sjell shumë eksperiencë dhe do të na ndihmojë shumë.”
