Një anije antike romake që daton nga shekulli i dytë para Krishtit, është zbuluar në Detin Mesdhe pranë brigjeve të Palermos. Anija kishte mbetur në thellësinë 92 metra pranë ishullit ‘Isola delle Femmine’.
Robotët nënujorë kanë kapur pamje nga anija e fundosur romake, e cila ishte e mbushur me qypa vere të cilët datojnë prej shekullit të 2-të p.e.s. Zbulimi përshkruhet nga autoritetet si eventi më i rëndësishëm arkeologjik i viteve të fundit, shkruan The Guardian.
“Deti Mesdhe vazhdon të na japë elementë të çmuar të rindërtimit të historisë sonë, të lidhur me tregtinë detare, me tipet e anijeve të lashta dhe transportin e kryer prej tyre”, tha drejtuesja e çështjeve detare për rajonin e Siçilisë, organizatore e ekspeditës.
Zbulimet hedhin dritë mbi aktivitetin tregtar të romakëve në detin Mesdhe, ku ata tregtonin erëza, verë, ullinj e produkte të tjera drejt Afrikës së Veriut, Spanjës, Francës e Lindjes së Mesme. Një anije thuajse e paprekur romake të shekullit të dytë u zbulua në 2013 në brigjet e Genoa, e cila përmbante rreth 50 qypa të çmuar, në rreth 50 metra thellësi.
Çdo vit, qindra amfora antike romake , të marra në mënyrë të paligjshme, gjenden nga policia italiane në shtëpitë e tregtarëve të artit. Në qershor, autoritetet italiane zbuluan amfora arkeologjike të grumbulluara ilegalisht nga një koleksionist belg, që datojnë që në shekullin e gjashtë para Krishtit dhe me vlerë 11 milion euro.
