Apolonia është një nga destinacionet e preferuara për turistët, teksa gjatë 6-mujorit të parë të këtij viti, e kanë vizituar afro 13.000 vizitorë.
Një shifër rekord kjo për gjysmën e parë të një viti që nga viti 2006, kur është krijuar Parku arkeologjik.
Sipas drejtorit të Zyrës së administrimit dhe Koordinimit të Parkut arkeologjik Apolonia, Marin Haxhimihali numri i turistëve vendas ka shënuar një rritje me 41% në krahasim me vitin e kaluar, kurse numri i turistëve të huaj me 54%.
“Kjo tendencë është edhe në vazhdim, konkretisht këtë nivel të ardhurash nga biletat që ka rritje në 44%, kemi pasur vitin e kaluar deri në muajin shtator, çka na le të besojmë se kemi përpara muajt të mbarë të korriku dhe gushtit, që dihet se janë piku i vizitueshmërisë në trashëgiminë kulturore”, tha Haxhimali për Report Tv.
“Kam qenë këtu para 10 vjetësh. Tani që rikthehem jam mrekulluar nga ndryshimet që shoh që kanë ndodhur gjatë këtyre viteve. Kjo tregon se çfarë pasurie ka ky vend dhe sa e rëndësishme është kultura për këtë vend”, u shpreh një turist gjerman.
Punimet restauruese dhe disa zbulime të reja mendohet të kenë ndikuar në rritjen e numrit të turistëve.
