Një ndër shfaqjet me të shikuara në Teatrin Kombëtar të Kosovës, “Bordel Ballkan” është anuluar të martën, vetëm 20 minuta para kohës kur duhej të niste.
Anulimi ka ndodhur pasi aktori Armend Baloku ka refuzuar të marrë pjesë në shfaqje në shenjë proteste për pakënaqësitë e tij ndaj institucionit ku punon, TKK-së.
Për rrjedhojë, teatri është detyruar të mos hapë dyert për ata që kanë rezervuar mbi 100 bileta dhe të tjerët që kanë lënë t’i presin biletat pak para se të niste shfaqja.
“Me përgjegjësi mund të them se rreth 400 veta janë kthyer mbrapa sonte. Kjo është njëra prej shfaqjeve më të shikuara në TKK dhe sonte kanë ardhur shumë njerëz pasi ka kohë që nuk është dhënë ‘Bordel Ballkan’”, ka thënë organizatori i TKK-së, Beqir Beqiri.
Edhe aktori Armend Baloku, i cili ka refuzuar të luajë, ka sqaruar bojkotimin e shfaqjes, nëpërmjet rrjetit social “Facebook”:
“Në shenjë proteste sonte nuk do të interpretoj në shfaqjen ‘Bordel Ballkan’”, ka shkruar ai në profilin e tij. Aty ka shkruar se ka kohë që ka reaguar përbrenda institucionit, lidhur me nivelin e ulët, qoftë të organizimit, qoftë nga ana artistike e, sipas tij, fatkeqësisht asgjë nuk ka ndryshuar.
