Pas largimit të Zinedine Zidane, Real Madrid ishte në kërkim të një trajneri të madh që të merrte drejtimin e madrilenëve. Perez duket se kishte zgjedhur Antonio Conten, pasi ky i fundit nuk ishte në një pozitë të mirë tek Chelsea dhe ishte i gatshëm të ndryshonte ambient. Në plan të parë dukeshe se gjithçka ishte gati për tu mbyllur si marrëveshje, por në fund Florentino Perez befasoi të gjithë me marrjen e Julen Lopeteguit, duke shkaktuar zinxhirin e tërbimit të Federatës Spanjolle të Futbollit që e shkarkoi teknikun një ditë para se të niste Botërori.
Spanjollja “AS” shkruan se kandidaturën Antonio Conten “e dogji” Sergio Ramos. Kapitenit të Realit i ishte kërkuar marrja e mendimeve nga kolonia e lojtarëve spanjollë që Conte ka komanduar tek Chelsea. Emrat e pyetur kanë qenë Fabregas, Morata, Pedro, Azpilicueta e deri tek Marcos Alonso.
“El Pais” nga ana tjetër nuk thotë se cili prej lojtarëve ka “tradhtuar” italianin, por deklaron se vlerësimi dhe vendimi përfundimtar është bazuar në një mendim të përgjithshëm të lojtarëve spanjollë të Chelseat.
