Komisioneri Johannes Hahn ka folur para medieve pas takimit informal të zhvilluar mes kryeministrave të Ballkanit Perëndimor, të mbajtur në Durrës.
Gjatë fjalës së tij, Hahn u shpreh optimist për anëtarësimin e Shqipërisë në BE, teksa ka nisur edhe procesi i reduktimit të numrit të azilkërkuesve në Evropë.
Sipas Hahn nuk ka një datë konkrete lidhur me anëtarësimin, megjithatë ai tha se Shqipëria është në rrugën e duhur drejt BE-së.
Gjithashtu, komisionari u shpreh i pakënaqur lidhur me tregtinë mes vendeve, të cilën e cilësoi njësoj si atë të 10 viteve më parë.
FJALA E HAHN:
Ne diskutuam se si të zbatojmë plane të përbashkëta ekonomike. Sot në takimin informal u diskutua se ka një rritje të vëmendjes të qeverive për procesin e integrimit. Interesi ynë është që të gjitha këto vende të anëtarësohen sa më shpejt në BE, prandaj këto masa janë të nevojshme. Këto reforma përmirësojnë jetën e qytetarëve, prandaj po fokusohemi te zona ekonomike. Tregtia mes vendeve nuk është rritur, është njësoj si 10 vite më parë. Prandaj duhet investuar dhe kryeministrat duhet të kujdesen që marrëveshjet mes vendeve të zbatohen. Disa vende të BE-së po njohin përpjekjen e Shqipërisë për reduktimin e numrit të azilkërkuesve. Do të ishte përpjekje e kotë që një shqiptar të marrë azil në vendet e Evropës, ju lutem mos e bëni. Kjo tregon se vendi nuk është i gatshëm për integrimin në BE dhe kjo nuk është e vërtetë, prandaj duhet bërë diçka. Ju kërkoj që të kuptoni se nuk dua të flas për ndonjë datë të caktuar, por ekipi ynë ka një interes të madh që ta çojmë përpara Shqipërinë, se ndryshe nuk do kishim investuar kaq shumë energji. Rezultati do të jetë anëtarësim për Shqipërinë në BE në nj moment të caktuar./ Tirana Today
