Ambasadori i Bashkimit Evropian në Shqipëri, Luigi Soreca, ka komentuar ngjarjen në Bularat. Teksa ishte i pranishëm në një aktivitet në Fier, Soreca tha se Shqipëria duhet të mbrojë komunitetet minoritare, ndërsa bëri thirrje që të gjendet një marrëveshje mes Greqisë dhe Shqipërisë për zgjidhjen e çështjeve të mbetura pezull.
“Marrëdhënia mes Shqipërisë dhe Greqisë është një çështje dypalëshe. Është e rëndësishme për ne si BE që të dy vendet të gjejnë një marrëveshje për rrugëtimin e Shqipërisë drejt BE. Po ashtu është e rëndësishme që minoritet dhe pakicat në Shqipëri të mbrohen”, tha ambasadori.
Po ashtu, Soreca ka komentuar edhe dorëheqjen e ministrit të Brendshëm, Fatmir Xhafaj, ndërsa tha se ministri i ri duhet të vijojë luftën ndaj krimit:
“Gjatë muajve të fundit, Ministria e Brendshme ka ndërmarrë disa veprime shumë të rëndësishme dhe në krye të tyre ka qenë ministri Fatmir Xhafaj, prandaj edhe vlerësimi ynë për ministrin është i qartë. Ne shpresojmë që ministri i ardhshëm dhe qeveria do vazhdojë luftën kundër krimit të organizuar dhe korrupsionit në të gjithë vendin. Në fakt ne presim që kjo gjë të ndodhë pasi është në të interes të të gjithë qytetarëve të Shqipërisë. Ata që do të luftojnë krimin dhe korrupsionin do të kenë në krah BE-në.”
