Ambasada e Shteteve të Bashkuara të Amerikës në Tiranë njofton të gjithë shtetasit amerikanë që të kenë kujdes ditën e pashkëve në Shqipëri, pasi mund të ketë sulme terroriste.
Sipas njoftimit të ambasadës në gjuhën angleze, grupe terroriste kanë kërcënuar se mund të kryejnë sulme. Kështu, ambasada njofton shtetasit e saj në Shqipëri, që të rishikojnë planet e tyre, të shmangin tubimet dhe vendet me shumë njerëz.
Ambasada Amerikane në Shqipëri u kërkon qytetarëve amerikanë të bëjnë kujdes të veçantë gjatë festave të ardhshme fetare, në festivale apo ngjarje të mëdha.
“Terroristët në rajon kanë kërkuar edhe më parë të sulmojnë objekte të tilla, si kisha apo vende adhurimi, sheshe këmbësorësh, arena sportive, sallat e koncerteve apo tubimet publike. Rishikoni planet tuaja personale të sigurisë, kini kujdes nga personat që ju rrethojnë, monitoroni stacionet e lajmeve. Mbani një nivel të lartë vigjilence dhe ndërmerrni hapat e duhura për të rritur sigurinë tuaj personale”, thuhet në njoftimin e ambasadës së SHBA-së.
