Kuqezinjtë vazhdojnë përgatitjet për përballjen e së hënës me Norvegjinë në “Elbasan Arena”. Në konferencën për mediat ditën e sotme është shfaqur mbrojtësi i majtë, Naser Aliji. Një lojtarë i ri në moshë dhe që premton të ardhme, por që është grumbulluar vazhdimisht nga Panucci. Aliji e sheh si mundësinë më të mirë këtë ndeshje, pasi nuk është i ftuar Ansi Agolli dhe ai premton që të japë maksimumin për të marrë vendin e titullarit, jo vetëm për këtë ndeshje por përgjithmonë.
“Unë e shoh si një mundësi shumë të madhe për mua, sepse Ansi nuk është i grumbulluar dhe mund të futem edhe në formacion. Këtu nuk po flas vetëm për këtë ndeshje, por edhe për të ardhmen”, tha Naser Aliji, futbollist i Kombëtares kuqezi.
Trajneri Panucci vendosi që të marrë sërish nën urdhrat e tij për këtë ndeshje edhe Ylber Ramadanin, që nuk ka ngurruar ta falënderojë atë për këtë mundësi që i dha.
“Dua të falënderoj Panuccin për ftesën. Nëse do të më aktivizojë në fushën e lojës do të jap maksimumin tim. E kam pritur që fëmijë grumbullimin me Kombëtaren A, ndaj do të punoj shumë që një ditë të jem pjesë e formacionit. Mendoj se do të hyjmë në fushën e lojës për të fituar për rritjen e moralit të skuadrës”, tha Ylber Ramadani, futbollist i kuqezinjve.
