Kryetari i lëvizjes Vetëvendosje, Albin Kurti e cilëson çështjen e ngritur së fundmi nga presidenti i Kosovës, Hashim Thaçi për shkëmbime territoresh, si përpjekje e vetë presidentit të Kosovës për t’i shpëtuar Gjykatës Speciale.
Në një intervistë për “Zërin e Amerikës”, lideri i Vetëvendosjes thekson se Hashim Thaçi po bën një lojë të pistë politike.
Sipas tij, gjithçka që ka ngritur presidenti i Kosovës për korrigjim kufijsh po krijon një precedent të rrezikshëm për shkëmbimin e territoreve. Kurti vë në dukje se Kosova rrezikon të humbasë veriun e Kosovës, ndërsa vetë Thaçi, sipas tij, nuk artikulon asnjë krahinë tjetër për t’ju bashkuar Kosovës, përveç Luginës së Preshevës.
Albin Kurti shton se është kundër humbjes së veriut të Kosovës edhe në rast se Shqipëria bashkohet me Kosovën.
“Synimet për korrigjim territoresh ose shkëmbim territorial janë synime të gabuara, që do të kenë pasoja të dëmshme. Korrigjimi i kufijve bëhet për arsye minore që maten prej dhjetëra apo qindra hektarësh maksimalisht, por kurrsesi me një krahinë të tërë siç është ajo e Preshevës, Medvegjës dhe Bujanocit. Korrigjimi i kufijve bie tek regjistri i demarkacionit dhe këtë të enjte bëhen saktësisht gjashtë muaj prej se presidenti Thaçi ka nënshkruar marrëveshje me homologun e tij malazez Vujanoviç për korrigjimin e kufirit me Malin e Zi. Ai nuk e bëri me Malin e Zi, kemi marrëveshje të nënshkruar dhe asnjë hap në terren dhe tash po kalon në korrigjimin e radhës. Për bindjen time, ajo çfarë po ndodh më shumë ka të bëjë me tendencën e tij që të jetë sa më larg Gjykatës së Posaçme që e ka imponuar vetë se sa që Kosova të jetë më afër shtetndërtimit apo integrimeve evropiane”, thekson Albin Kurti për Zërin e Amerikës.
