Sapo nisi punën për Luftëtarin, trajneri Skënder Gega ka marrë një lajm jo të mirë. Kapiteni Alban Hoxha, braktisi grumbullimin me Kombëtaren, për shkak të një dëmtimi që mori në gjurin e djathtë.
Doza e ankthit është shtuar edhe më shumë, pasi portieri është dëmtuar pikërisht aty ku ka pasur probleme dhe në të shkuarën. Nga shenjat e para, lëndimi duket më shqetësues se zakonisht.
Nëse Hoxha i nënshtrohet operacionit, për rrjedhojë i bie që ai ta mbyllë sezonin. Në raste të tilla duhen mbi 6 muaj, që të rikuperohesh plotësisht. Gjithsesi, në kampin e kuq po luten dhe “mbajnë frymën” që dëmtimi i kapitenit të mos jetë i rëndë, në mënyrë që Partizani të mos humbasë liderin dhe sigurinë në prapavijë, kur dihet se ka pësuar vetëm 1 gol në 8 javë kampionat.
